15 mars 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
CARNAVA 1
Bràvis ami, bèn lou bon-jour en tóuti e sigués li bèn-vengu dins lis Ermas. La rodo viro e cade an lou
calendié nous guido dins lou trin di fèsto que se van debana. Aquesto semano nous anan interessa au
Carnava. De-segur, coume lis autro, aquelo fèsto es ligado à la religioun. Pamens premié, es lou coustat
festiéu que nous interèsso. Ço de reteni es lou boumbimen di festejaire. Dins lou conte « Lis amelo »
manleva dóu libre ufanous publica en 1953, L’Erbo de la routo, Carle Galtier escriguè à respèt de l’èsse
uman : « La fèsto es-ti pas, mai que tout, un boumbimen contro tout ço que nous aclapo, nous coustren
o nous esfraio… lis abitudo, la soucieta, lou destin ? … Es lou moumen mounte l’on póu tout aclapa !
Se manjo coume quatre, se bèu coume sièis, s’óublidon li soucit, l’on se trufo di prejujat e l’on fai meme
lou pan de nas au Destin… L’on se deliéuro, l’on desboundo ! ... Pièi, d’aquéu biais apasia, l’on pòu
s’endraia tournamai dins lou gris de la vido vidanto… Mai èro necessàri aquéu boumbimen ! ... Se, tèms
en tèms, se poudié pas gangassa soun destin, n’en crebarian ! … Es aqui, dóu mens, ço qu’ai cresegu
coumprene ». Es tambèn ço que nautre avèn coumprés. Aquelo proudigalita de la fèsto, aquèu degai a
sèmpre interessa lis etnoulogue de touto meno. Es eisa de coumprene que Carnava e d’àutri fèsto se
resumon pèr la negacioun dóu quoutidian, uno envejo salutàri de se deliéura e de s’afranqui dis
coustrencho e de cop que i’a de trespassa li règlo mouralo e soucialo. Aquéli que decidon l’an coumprés
acò, que le mounde, un cop qu’an pouscu prouficha de bòni causo, qu’an pouscu crèire mestreja son
astrado, pendènt quàuqui jour, tornon à soun travai e reprenon lou coulas sènso roumega. Dins la fèsto,
i’a plus ges d’individualisme pèr lis un, de soulitudo pèr lis autre e la fèsto es un antidot, un contropouisoun is angouisso e i soufrènço e permet en fin finalo d’anticipa li counflit e apasia li tensioun. Desegur, lis eicès fan partido de la fèsto. Es de bon que la vido vidanto s’endevèn em’un sistèmo d’interdi
qu’aclapo lou mounde. Dins la fèsto, poudèn manja à se n’en rèndre malaut, bèure coume d’arquin. À
forço de béure au flasco au sèns figura, lou fau faire au sèns propre pèr tourna à ‘n estat siau.
Malurousamen ço qu’èro verai ièr, l’es plus vuei. Lis autourita an declara que la fèsto es pas, o pulèu es
plus essencialo. Verai que li coundicioun sanitàri soun plus li memo qu’à passa tèms. Aro sian intra dins
uno pountanndo de gèst-barriero e de precaucioun. Pamens es pas de faire carnava que fai de couvido.
Es la couvido que fai que poudèn plus faire carnava. Mai de fèsto publico n’i’a à bóudre emé li feria e
àutri rassemblamen liga à l’ecounoumìo. Es estrange, tre que sian à parla de dardeno, li causo soun plus
noun-essencialo. Se levan d’acò l’ipoucrisìo, lou poun de visto es plus lou meme. Segur qu’acò’s un
mejan moudèrne d’analisa lou proublème. Coume que siegue la fèsto rèsto un moumen eficace de
purgacioun di passioun. Avèn bèu assaja de pas parla de religioun, la religioun es presènto dins li fèsto,
en liame emé la naturo. Carnava es en raport emé la luno que decido de la dato de Pasco e l’aurre. Lou
trin di fèsto s’endevèn emé lou cicle de la naturo e lou cicle dóu mounde dins sa vido vidanto.
L’etnoulogue prouvençau, Laurèns Sebastian Fournier ié vèi un biais pervers de la fèsto, vo pulèu
d’aquéli que van counsidera la fèsto qu’abalis un double discours ; la fèsto es au cop dounado au pople
pèr lis edile que volon la pas soucialo e èstre revendicado coume un sourgènt de desordre souciau.
Adounc, aquéli que decidon podon declara la fèsto coume noun essencialo vo lou countràri segound li
circoustànci. À passa tèms, lou pople èro proche de si racino e coumprenien l’óurigino di fèsto ; vuei
dins nosto soucieta eterougèno, quau saup d’ounte vèn ? Quau pòu faire de diferènci entre lou proufane
e lou sacra ? Lou sacra es nega, óublida la mage part dóu tèms. Es ansin dins nosto soucieta mouderno.
L’essenciau es de festeja, de viéure de fèsto vengudo noun-essencialo. Anas coumprene. Coume que
viro, essencialo vo noun-essencialo festejaren ! Soulide.
Aro la crounico es acabado, vous doune rendès-vous la semano venènto e diren un mot sus Carnava.
D’eici aqui, sigués fièr e gaiard. Vous brassèje amistousamen. Brave mounde adissias !
Felip
