23 avril 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
Bràvis ami, bèn lou bon-jour en tóuti e sigués li bèn-vengu dins nòstis Ermas. N’en sian à la crounico dos cènt vintenco. Un comte round que nous bouto à traire uno uiado pèr dessus nosto espalo pèr vèire lou camin fa. Un bèu percours emai se, de cop que i’a, se veguèsse pouncheja uno manco d’idèio. Lou counfèsse, aquesto semano sabe pas mounte metre mi pèd estènt qu’ai la tèsto vuejo vo quàsi. Pamens i’a pas gaire de tèms d’acò pèr lis escoulan mounte assaje de baia quàuqui cours de lengo, faguère la chausido de basti un doursié à l’entour de la garanço, uno planto que durbiguè uno pajo de prousperita ecounoumico dins noste relarg. Es de saupre qu’aquelo istòri coumencè peraqui milo cinq cènts an avans Jèsu que deja la garanço èro cultivado en Asìo centralo e en Egito pèr n’en faire de tencho. D’efèt, de teissut acoulouri fuguèron retrouba dins lou toumbèu dóu faraoun Toutankhamon e dins li rouino de Poumpèi. À l’age mejan, Carle-Magne baiè d’encourajamen pèr la culturo de la garanço que lou sòu oulandés i’agradavo e la garanço aguè lèu fa de veni un moutour pèr l’ecounoumìo loucalo.
Souto lou règne de Louïs lou XIVen, la garanço presentè encaro un grand interès ecounoumi e Colbert proumulguè ‘no istrucioun pèr favourisa sa culturo e soun emplé. Un édit descargavo de l’impost tóuti aquéli qu’acoutrarié la garanço dins la palunaio assecado. En 1698, Martin, un marchand nimesen avié óutengu un privilège reiau pèr introudurre aquelo culturo en Lengadò, pamens s’alassè de-bado à lou faire après dos o tres annado de tèms. E l’Óulando gardavo lou mounoupòli d’aquelo ativeta.
Dintre li noum impourtant dins l’istòri de la garanço, subre-que-tout dins lou Miejour, i’a lou d’un agrounome armenian que ié disien Hovhannès Althounian, di Jan Althen que nasquè devers 1709. Soun paire qu’èro ambassadour en Turquìo souto Jóusè 1é, emperaire germani, fuguè assassina pèr li Turqués. Un pau plus tard si tres fraire fuguèron tua éli tambèn. Jan garcè soun camp, pamens fuguè catura pèr lis Aràbi au sud de la mar Negro e vendu pièi pèr esclau. Dins lou Trésor, pajo 74, Mistral parlo de Jan Althen coume d’un « aventurié ». Pendènt li quinge an de sa cativeta, Jan Althen cultivè la garanço. Reüssiguè à s’escapa e arribè en Franço à Marsiho, en 1736. Se maridè e sa doto ié permeteguè d’èstre presenta à la court de Versaio. Louïs lou XVen ié pourgiguè de terro à Castres en 1743, mounte fasié culturo de coutoun. Après quàuqui falido à-de-rèng, se troubè sènso lou dequé e rejougneguè Marsiho. Lou direitour de la manifaturo reialo de Sant-Chamount lou counvidè pièi à Sant-Estève en 1753 pèr cultiva la garanço. Touto fes, lou climat de Fourés agradavo pas brigo à la garanço e Althen se gandiguè en Avignoun en 1763 e ié faguè d’assai sus lou grand, vole dire à grando escalo. La premiero garanço espeliguè au doumaine de Vasserot qu’èro la prouprieta dóu marqués de Cau-Mount, premié conse d’Avignoun. Li guerro de la Revoulucioun faguèron pièi d’empacho à la culturo de la garanço e au coumerce. Pamens tre la fin dóu counflit, li garancié tournèron i champ. Uno recouneissènço tardiero fuguè rendudo à l’agrounome armenian. D’efèt, en 1821, le Consèu generau de la Vau-Cluso desvelè ‘no lauso que dessus avien escrincela aquéli mot : « À Jean Althen, Persan, introducteur et premier cultivateur de la garance dans le territoire d'Avignon, sous les auspices de M. le marquis de Caumont en MDCCLXV [1765] ». En 1829, li recerco permeteguèron de traire la garanço de la racino e d’espourta aquéu proudu souto la formo d’uno poudro en Alemagno, en Anglo-Terro e is Estat-Uni. Despièi, un quartié coumplèt de Mountèu dins la Vau-Cluso, que si palun avien vist s’istala li premiéri garanciero, fuguè destaca de la viloto pèr ourdounanço dóu 4 de jun 1845 e enaussa en vilo independènto souto lou noum d’Alten des-Paluds, lou 5 de jun 1845. Lou blasoun de la vilo es « rouge au luchet à garanço d'or, acousta de dos flour de garanço dóu meme, à la pleno oundado d'argènt e d'azur » (de vèire çai-contro). La vilo d'Avignoun enaurè uno estatuo de brounze sur la roco de Dom que fuguè inagurado lou 21 de nouvèmbre 1847. Althen se mouriguè dins la paureso en 1774. Pamens la garanço ié subre-visquè… jusqu’en 1868. N’en parlaren d’acò la semano venènto. Soulide. Se voulès anan acaba ‘mé lou refrin de la Cansoun di garancié que dis : « Adiéu ! Althen ! Se sian pas mort tournaren l’an que vèn ! Se sian pas mort, tournaren l’an que vèn ! »
Aro la crounico es acabado e farai coume li garancié, se siéu pas mort tournarai la semano venènto. D’eici aqui, avanças d’un pas lèri. Vous brassège amistousamen. Brave mounde adissias !
Felip
