25 juin 2025
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
ASSAUT DE DANSO À FOURCO
Bràvis ami, bèn lou bon-jour en tóuti… I’a pas gaire de tèms, m’es esta douna de vèire, à Fourco de Gard, l’Assaut de danso ourganisa pèr la Federacioun de Fóuclore Mediterragno, es à dire, la FFM. La federacioun, li candidat e lou publi èron aculi pèr la valènto Escolo d’Argènço, escolo felibrenco, beilejado pèr la mestresso d’obro Patricia Disset e sis afihado, noumbrouso, e sis afiha avien ourganisa ‘quelo journado d’un biais de requisto em’ un afougamen remirable. La Federacioun de Fóuclore Mediterragno, qu’es uno assouciacioun 1901, espeliguè en 1959 à Castèu-Gombert, proche Marsiho. Soun role, encaro vuei, es culturau, educatiéu, souciau e la FFM repauso sus lou voulountariat bountous. Encuei, i’a gaire mens de setanto group que ié soun recampa dins tres regioun e douge despartamen. Sa toco es pluralo, entre la mantenènço e lou desvouloupamen dóu patrimòni, l’estùdi di tradicioun nostro, la couneissènço e la pratico dis art e tradicioun de nòsti terradou, l’aparamen de l’identita regiounalo, l’ajudo à l’ensignamen e l’encourajamen di group pèr enaura si valour culturalo regiounalo. Ié fau apoundre la recerco sus li coustume, la musico, la danso e l’aurre. Adounc, aquest jour d’aqui, i’avié vue jouὶni femo e un ome qu’assajèron de davera, sié lou diplomo de prevost de danso, sié lou de mèstre de danso. Après uno acuiènço calourènto avian lèu fa de senti la pressioun en raport emé l’impourtanço d’aquéu jour. Li candidato e candidat èron en bousco d’encourajamen e se vèi li caro frounsido dóu soucit de la reüssido. Pamens l’ambianço èro siavo e fraternalo. Alor pèr li prevost, tout se fai sus la baso de la gavoto ; pèr ço qu’es di mèstre de danso, es l’angleso vo la gigo. I’a dos meno d’esprovo de passa : la premiero, ié dison li pas impausa, es à dire, sènso musico. La jurado demando i candidat tau vo tau pas e li candidat e candidato eisecuton tout ço que i’es esta demanda. Es un eisercice redoutable estènt qu’à la fin dóu pas, fau garda l’equilibre e acaba lou pas dins la bono pousicioun. Acò demando uno mestrejo perfèto. I’a pièi, dins un segound passage davans la jurado, uno couregrafìo encadenado emé la musico. Dise pas qu’es mai-eisa de lou faire à respèt di pas impausa. Pamens lou fa d’encadena li pas permet de miéus garda la mestrejo de soun cors. Alors es un vertadié balet, emé lou pas de basco, li virouleto vouladisso, li terro-à-terro, lis alo de pijoun, li brisa, lis entrechau. E pèr li mèstre de danso que danson em’ uno bagueto, ié fau apoundre li brès, li cisèu e un pas qu’es di mai coumplia de faire, lou pas francés de la gigo. Es de saupre qu’aquéli diplomo soun de diplomo de bon dansaire e de bòni dansarello. Quand vesèn la resulto dóu travai coumpli, acò forço l’amiracioun. La jurado se coumpausavo de vue mestresso de danso. E, vo, ges d’ome dins la jurado. Remarcas, acó ‘s lou rebat de la realita sus lou pountin mounte d’ome, se n’en vèi pas gaire noun plus. Daumage. Quand li candidat passon à cha un à la seguido, emai se sentèsse lou respèt, se vèi degun regard amicau, degun sourrire. Sian en soufrènço pèr éli e se disèn que lou tèms dèu ié sèmbla ‘n brigoun lounguet. Pèr la sessioun de 2025, se parlè d’uno pichoto proumoucioun. Encó di prevost, dos chato an davera soun diplomo : Estello Grandmaison d’Arle e Alicia Serrano de Marsiho. Pèr li mèstre de danso, souleto, Marino Bachelier óutenguè ‘no mencioun ounourablo pèr la danso en musico. Vaqui pèr aquelo tradicioun de la danso que vèn de la marino. D’efèt dins la marino, lis òuficié avien de saupre dansa. De balèti èron ourganisa quand li batèu fasien soun escalo dins li païs fourestié pèr eisèmple. Lis óuficié an dins soun sa de linge un coustume pèr dansa. D’à cha pau acò venguè dins lou mounde e à la debuto i’avié que lis ome que dansavon e vuei sarié pulèu lou countràri. Lou presidènt de la federacioun, Dànis Pantaléo, nous aprenguè que lis Assaut de danso, que soun coumprés dins lis art et tradicioun poupulàri, soun iscri dins lou patrimòni inmateriau de la Franço, que soun un tra d’unioun entre la memòri e lou mouvemen e que la fidelita noun s’óupauso à la creacioun. Osco ! à l’Escolo d’Argènço que faguè lou liame entre tóuti pèr aquelo journado inóublidablo. Segur que la Federacioun de Fóuclore Mediterragno pò èstre fièro de ço que leisso is enfant. Soulide.
Vaqui, pèr aro, la crounico es acabado. Dich acò vous doune rendès-vous la semano venènto. D’eici d’aqui, tenès-vous fièr e gaiard. Vous brassège amistousamen. Brave mounde adissias !
felip
