21 mars 2025
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
50EN COUNGRÈS FEDERACIOUN FRANCESO CORSO CAMARGUENCO
Brave mounde, bèn lou bon-jour en tóuti… Dimenche 9 de mars, à Mouriès, se debanè lou cinquanten coungrès de la Federacioun Franceso de la Courso Camarguenco, que ié dison la FFCC. Quatecant pode dire que fuguè un coungrès de requisto. D’efèt, premié es de saupre que la FFCC, que nasquè en 1975 à Mouriès, es pèr rintra dins uno nouvello èro. Micoulau Triol lou rèire-presidènt sourtiguè aquelo federacioun dóu roudan ounte se degaiavo desempièi quàuquis annado. Pamens, alassa pèr lou travai coumpli, Micoulau se voulié pas presenta pèr un segound mandat. Troubè un ramplaçant emé Eri Mauras, qu’es tambèn souto-presidènt dóu clube de biòu la Coucardo de Lunèu. Despièi sa jouinesso, Eri counèis li gènt de bouvino e de roussatino e fuguè endraia d’ouro dins li tradicioun camarguenco bono-di si grand. En mai d’acò, dins la colo dóu coumitat direitour i’a toujour que mai de jouvènço e acò douno un toun dinami e fres coume uno briso printaniero à la presentacioun dóu coungrès. Li chifro soun elouquènt : à la federacioun, i’a 2 732 afiha que dintre éli se conto 105 rasetaire e 42 tournaire. Pèr fourma li rasetaire i’a 19 escolo que recampon 493 estagiàri, sié quàsi lou double que n’i’avié i’a quatre an d’acò. En 2024, emai 94 courso fuguèsson anulado que li plueio que n’en soun l’encauso, se n’en debanè 750 dins li vuetanto-dos areno di despartamen de Gard, d’Erau, de Bouco-dóu-Rose e de Vau-Cluso, mounte venguèron quàsi 410 000 espetatour. Ço qu’es de marca es que dins Erau i’a dous cop mens de courso ourganisado d’enterin que i’a dous cop mai d’espetatour. Acò vòu dire que i’a un raport de 1 à 4 pèr ço qu’es de la frequentacioun dis areno. Osco ! Erau. Es belèu la provo que de courso n’en faudrié ourganisa un pau mens… D’un autre las, quinge milo biòu trèvon li prat di 120 manado dóu relarg, sènso counta li manado que fan pas que de quitran, vole dire d’abrivado vo d’àutris espetacle dins li carriero di vilo e vilage. En tout, lou noumbre de manado testejo peraqui dous cènt. De-segur se parlè tambèn di suvencioun que fan la cabussado, mens 25 dóu cènt. Ni pèr acò, lou bilans financié presenta pèr Óulivié Ribes, espèrt-coumtable es à l’equilibre bèn talamen que lou coumissàri i compte, Roumié Pibarot ié dounè quitus. Dins un autre registre, moussu Sebastian Attias faguè un poun sus la questioun sanitàri. Emai fuguèsse grèu, soun prepaus èro apassiounant. Verai, la situacioun dóu mounde agricolo a ‘n ploumb à l’alo. En 1955, i’avié en Franço mai de dous millioun e mié d’agricultour, d’enterin que vuei n’en soubro tres cènt cinquanto milo. Valènt-à-dire que sian à ‘clapa lou granié francés que n’erian tant fièr encaro à la debuto dóu siècle vinten. Li cargo que li manadié an de paga soun toujour que mai lourdo : sanitàri e suen proufilati, asseguranço, mangiho e l’aurre e au contro, l’aléujamen que fuguè proumés s’endevèn coume un bouioun après la mort. E coume i’a pas proun de malur, se trobo plus ges de terro agricolo. Pènse pulèu que de terro, n’i’aurié, pamens tout comte rebatu, es pas interessant de li boulega pèr de parpello d’agasso. Pedala sus li vìo verdo, es pas deman pèr lis agricultour ! Avans lou discours sena dóu présidènt de la federacioun, Valerìo Ther presentè lou travai de la coummessioun « fourmacioun » que sa toco premiero es d’acoumpagna li jouine rasetaire dins soun percours iniciau. Pèr acò faire, l’ancian rasetaire proun couneigu Gerald Rado es lou baile d’aquéli jouine que li fau bèn óurienta tre la debuto. Pamens, un travai menimous ispira pèr d’àutri federacioun espourtivo permet d’endraia li aprendi rasetaire tout de long de sa carriero e de dela. Gestioun de la persounalita, messo en fisanço, vincre l’estrès e lou matrassun, se prepara pèr la coumpeticioun, subre-mounta li nafraduro, aprene li gèst de premiero ajudo e que sabe encaro iéu. Poudèn apoundre que pèr lou mounde d’aquelo coumeissioun, es impourtant d’encouraja li prougrès. Tout-bèu-just avans aquelo intervencioun, se parlè de la questioun medicalo. Pèr clava lou coungrès de la federacioun, lou pelot Danié Gillet, que sa manado s’espandis proche Mouriès – es à-n-Auriho – e que rempourtè lou Troufèu óu Tridènt d’Or, recebè di man dóu Présidènt lou diplomo federau. Lou discours d’Eri Mauras fuguè pièi ‘no marco d’encourajamen pèr li tèms
avenidou. En fin finalo aguerian un coungrès di bèu, vivènt, proufessiounau e sincère. Fuguè poussible pèr li participant d’esperlounga aquéu poulit moumen bono-di l’aperitiéu e un repas freirenau. Soulide.
Vaqui. Aro la crounico es acabado. Vous doune rendès-vous la semano venènto. Enant d’aqui, tenès-vous fièr e gaiard. Vous brassège amistousamen.
Brave mounde adissias !
felip
