28 novembre 2024
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
LI ROUGE DÓU MIEJOUR 2
.............................................
Brave mounde, bèn lou bon-jour en tóuti… Vous lou dise un cop de mai, qu’es lou felibre majourau Jan-Bernat Plantevin de la Vau-Cluso que parlo… I’a pas gaire faguerian la couneissènço de Fèlis Gras e entamenarian tout-bèu-just la presentacioun de soun libre Li Rouge dóu Miejour. Se fau ramenta que Fèlis Gras que nasquè en 1844 traversè la segoundo mita dóu siècle XIXen, uno pountannado bourroulado que veguè mant un chanjamen de gouvèr : mounarchìo de juliet de 1830 à 1848, la dousenco Republico de 1848 à 1852, lou Segound Empire enjusqu’en 1870, pièi de la tresenco Republico de 1870 à 1940. Pamens dóu tèms qu’èro jouine èro assabenta de ço fuguè la Restauracioun, lou premier Empire, li guerro napouleouniano, lou Counsulat, lou Direitòri, la Counvenciou e la Coustituanto. Pamens, lou fiéu de Malamort fuguè pertouca pèr la Revoulucioun Franceso. Es aquelo pountannado qu’es au cor de soun libre Li Rouge dóu Miejour chapouta en tres chapitre. Milo pajo que fuguèron publicado en 1895. Bono-di aquest libre, Fèlis Gras pòu èstre counsidera coume lou cap de filo di prousatour de Lengo d’o, en Prouvènço en tout cas. Li Rouge dóu Miejour es un rouman istouri que conto la mountado devers Paris dóu bataioun di Marsihés e l’insureicioun di Téularié dóu 10 d’avoust 1792. Perseguiguè pièi l’escrituro emé la Terrour e la Terrour blanco. Mai de cènt milo eisèmplàri dóu libre fuguèron vendu dins li librarié e en despié d’aquéu sucès, la maje part di majourau dóu Felibrige se moustrèron oustile, Frederi Mistral lou premié e particulieramen Carle Maurras que diguè : « Acò’s un carnava e un bourboui poulitician estraourdinàri ». Dounc forço mounde èron countrastaire fàci is idèio revouluciounàri. Encò de Roumaniho erian frejous – blanc de blanc subre-tout – e degun vouguè estampa lou libre. Lou soustèn vendra d’uno americano qu’avié noum Catarino Janvié que revirè lou libre en anglés en partènt de la versioun franceso de Gras, souto lou titre The Reds Of the Midi que fuguè publica à Nòuv-Iork, encò d’Appletown, lou 17 de febrié 1895. Es en 1896 que lou libre fuguè publica en Anglo-Terro encò de l’editour Heinemann e l’obro fourcè l’amiracioun de Wilhem Gladstone, lou premié Menistre. E es la memo annado que lou libre espeliguè enfin encò de Roumaniho, bono-di sa sorre Roso-Anaïs, véuso de soun espous que prenguè l’empento de la librarié Roumaniho. Dins la Prouvènço à l’endeman de l’Empire, après 1870, au cor dis ate contro-revouluciounàri, Li Rouge dóu Miejour couneiguè un sucès naciounau di bèu, diéu-merci soun espelido souto la formo d’un fuietoun semanié en versioun franceso dins un journau reputa d’aquéu tèms que ié disien Le Temps, edita pèr Jùli Rouff, l’editour de Vitour Hugo. En 1897, lou libre fuguè revira en rùssi e en 1899 en suedés, reviraduro facho pèr lou dóutour Maurise Boheman. Pau de libre en lengo aguèron uno astrado tant poulido. I’aguè tambèn en seguido d’àutris edicioun. L’istòri es la di Federa marsihés que se gandiguèron à Paris pèr faire toumba dóu cade la famiho reialo. Lou jouine Pascalet, que manjo dins si quinge an, rejoun li Federa pèr escapa à la justiço de soun endré estènt que lou Marqués de Malamort lou secutavo. Adelino, sa fiho, qu’èro pas d’acòrdi emé lou biais de faire de soun paire fugiguè dóu siéu e rejougneguè Pascalet. Li pajo d’istòri soun remirablo d’eisatitudo sus un founs de ficioun amourouso. La reviraduro en rùssi de 1897 permeteguè ‘no represso souto la formo d’un balet crea en 1932 pèr Vasily Vainonen et la troupo dóu Bolchoï de Mouscou sus la musico de Boris Assafiev que soun titre es Les Flammes de Paris d’après lou libre de Fèlis Gras Li Rouge dóu Miejour. Se dis qu’èro lou balet qu’Estaline amavo lou miéus e que l’aurié vist vint cop. Se jouguè jusqu’en 1964. Part acò, ié poudèn entèndre la Carmagnolo e la Marsiheso que venguè l’inne naciounau en óumage i Federa marsihés. La toco d’aquéu balet èro de moustra la countinueta entre la Revoulucioun franceso e la Revoulucioun Boulchevico. Adounc, Li Rouge dóu Miejour trespassè li raro de la Franço mant un cop e lou balet es vertadieramen remirablo. Li Rùssi apoundeguèron de persounage, en particulié la sorre de Pascalet que ié dison Janeto e un ome qu’amo Janeto, que soun noum es Felipe. Vaqui l’istòri d’aquéu libre lou mai vendu que fuguè escri premié en prouvençau pamens pas edita, revira en quatre lengo e que couneiguè un sucès di grand dins lou mounde avans que d’èstre publica en prouvençau. Vous lou tourne dire, regardas lou balet que soun titre es Les flammes de Paris vo Flams of Paris ; es imparaulable de bèuta. Soulide.
Vaqui, aro la crounico es acabado, tourne dire mi gramaci calourènt au majourau Jan-Bernat Plantevin e dich acò, vous doune rendès-vous la semano venènto. D’eici aqui, avanças d’un pas lèri e tenès-vous fièr e gaiard. Vous brassège amistousamen. Brave mounde adissias !
felip
