27 juin 2025
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
SANTO-ESTELLO SANT-TROUPÈS
Bràvis ami, bèn lou bon-jour en tóuti… Aquest an, coume en 1955, lou Baile Sufrèn « que sus mar coumando » nous a « douna signau ». E dounc la Santo-Estello dóu Felibrige se debanè à Sant-Troupès. Fuguerian recebu calourentamen pèr la vilo vareso que lis elegi, premié madamo lou maire, Silvìo Siri e lou grand, l’enorme, l’ufanous Jórgi Giraud soun premier ajoun avien fa soun proun pèr alesti un prougramo de requisto. Alor vous vau parla de la Santo-Estello dóu Felibrige sènso vous parla de la Santo-Estello dóu Felibrige. Pulèu vous vau counta quàuqui rescontre en musico…
Premié au teatre de la Ciéutadello, lou divèndre de sèr i’avié un espetacle emé lou Rampèu de Sant-Troupès, li fifre e li tambour de Sant-Troupès, l’Escandihado de Grimaud e lei Magnòli de Santo-Maimo. Sus lou pountin, la mar dóu gau de Sant-Troupès fasié lou decor… Tambour-Fini
L’endeman, dins uno carreireto, la carriero Sant-Jan, au cor de Sant-Troupès, dins un restaurant que i’an mes « Le Pêché Mignon », s’erian entaula e proche de nautre recouneguerian lis afiha de l’Escloupeto de Roudés. Se fasien pas prega pèr canta Jan Boudoun. ITW + cansoun.
Lou dimenche de matin, en la glèiso Nosto-Damo de l’Assoumpcioun, à la messo en lengo nostro, i’avié ‘no couralo fourmado emé lou Rampèu de Sant-Troupès e l’Escandihado de Grimaud. Au moumen de l’elevacioun, la musiciano Laurènço Deou interpretè uno musico, courteto mai talamen poulido que vous la prepauso, emé quàuqui viro-lengo di mai bèu… Laurènço Deou.
À 4 ouro dóu tantost, dissate 7 de jun, l’istourian Laurèns Pavlidis e lou group Bàrri Nòu alarguèron uno counferènci musicalo sus lou Baile Sufrèn que sa cansoun es dins Mirèio. Jòrgi Giraud prenguè la direicioun de la vespardo e se sian regala… Lou Baile Sufrèn.
De coume acò n’avèn encaro dins nòsti tiradou. Aquest an i’avié li Jo Flourau setenàri dóu Felibrige. La grand Laureato n’es la remirablo Anìo Bergese que chausiguè pèr Rèino dóu Felibrige la rèire-rèino d’Arle Camiho Hoteman que sucedis à la gènto rèino Adelino. Avans que de se dessepara, vole dire qu’en fin finalo Sant-Troupès es uno viloto coume un paradosse : es au cop un caire-fourc de tourisme internaciounau emé d’un coustat, soun port magnifi e si batèu remirable, soun bistè-frito à cènt vin éurò, si boutigo Louïs Vuiton e si Ferrari, si Bentley e si Porche e d’un autre las, tres cènt metre plus luen, sis androuno, soun vilage, si restaurant mounte avèn d’acuiènço e lou mounde que rèston sensible à sa lengo e à si tradicioun. N’i’a pèr tout lou mounde. E nautre avèn agu un coungrès santestelen chanu e magnifi. Soulide.
Vaqui, pèr aro, la crounico es acabado. Dich acò vous doune rendès-vous la semano venènto. D’eici d’aqui, tenès-vous fièr e gaiard. Vous brassège amistousamen. Brave mounde adissias !
felip
