10 juillet 2025
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
MARCELLO DRUTEL
Bràvis ami, bèn lou bon-jour en tóuti… Dintre li persouno que fau ounoura en 2025, de dela dóu meravihous Mas Rouquette, poudèn apoundre lou noum de Marcello Delpastre e lou de Marcello Drutel que nasquè à Marsiho en 1897 e que mouriguè à Touloun en 1985. Lou premié cop que m’interessè à-n-elo, fuguè quand ère à redigi ma tèsi sus Carle Galtier. Ère à evouca Suli-Andriéu Peyre que, de moun vejaire, soun merite fuguè d’agué farga de persounalita diferènto acampado dins un meme univers mentau. D’efèt Jòrgi Reboul escriéu pas coume Carle Galtier, nimai coume Mas-Felip Delavouët o Jan-Calendau Vianès o encaro Pèire Millet, Farfantello e ges dintre éli escriéu coume Peyre. Pamens aquelo federacioun à l’entour de Peyre èro pas partejado pèr Marcello Drutel. Galtier l’escriguè à Peyre : « Misé Drutel laisso desbounda soun fèu. […] Delavouët vous aura di en queto pauro estimo nous tenié, Jòrgi, Calendau, éu e iéu qu’avian pas sachu coume elo, nous deliéura de la jougato Marsyas !!! ». Emai pourtèsse ges de jujamen sus aquéu vejaire, Marcello Drutel m’apareiguè coume uno persouno que disié soun franc valentin au mounde. E dóu cop me siéu interessa premié à la femo pulèu qu’à l’autour. Dins soun libre Pour la langue d’oc à l’école, de Vichy à la loi Deixonne, les premières réalisations de la revendication moderne en faveur de l’enseignement de la langue d’oc, libre que fuguè publica en 2016, Yan Lespoux reprenié li paraulo de Pèire Azéma que diguè dins la revisto Calendau de juliet 1940, en parlant dis errour di gouvèr avans lou de Vichy : « mau-gouvèr, inchaiença e flaquige, pigresa e jouïna, oublidança de las vielhas vertuts e de las sanas tradiciouns dau terraireʹʹ ». Yan soulignè tambèn li mot de Marcello Drutel qu’evouquè, au mes d’óutobre 1940, « la falido de l’escolo primàri ». Adounc venguè toujour que mai curious de counèisse aquelo damo. Après sis estùdi au licèu Mount-Grand de Marsiho, pièi à l’universita di letro de z-Ais-de-Prouvènço, Marcello Drutel venguè proufessour de letro à Cano, à Sisteroun pièi e pèr acaba dès 1919 à z-Ais-de-Prouvènço ounte dounè de cours de prouvençau à l’Escolo Nourmalo d’Istitutriço jusqu’à sa retirado en 1958. En mai d’acò, toucavo lou galoubet e lou tambourin e foundè lou Roudet de z-Ais-de-Prouvènço. Fuguè dins la colo que foundè l’assouciacioun pedagougico dóu Prouvençau à l’Escolo en 1945, n’èro la souto-cabiscolo emé Marius Jouveau proche Carle Mauron e Camihe Dourguin, e tambèn dins la chourmo de l’Assouciacioun vareso pèr l’ensignamen dóu Prouvençau en 1971. Coume n’i’avié pas proun participè à la foundacioun de la Soucieta d’Istòri e d’arqueoulougìo de Nime en 1933. Descurbiguère ansin uno militanto, uno femo que, quand avié couta, avié couta. Pèr ço que pertoucavo la questioun de la lengo e de la culturo nostro, èro la prouprietàri e avié de souleiant. Pendènt la segoundo Guerro moundialo, èro ativo dins la resistanço e baiè d’ajudo i presounié. Venguè la meirino de l’Escola dels Embarbelats, foundado pèr Pèire Miremont en 1940. Abalissié ‘no devoucioun vertadiero à respèt de Teoudor Aubanèu bèn talamen que prenguè l’escais-noum de l’Aubalenenco. Adounc, poudèn coumprene qu’aquéli afihacioun se perseguiguè dins soun obro estènt que lou titre de soun premié libre en 1933, Li Desiranço, emai demourèsse en rèire d’Aubanèu pèr ço qu’es di pounchounado de la car, Marcello Drutel evouquè sènso fali l’amour carnau dins un libre tout autant plen se sensualita. Fuguè elegido majouralo dóu Felibrige en 1950, Cigalo di Jardin après Jóusè Roumaniho e Jóusè d’Arbaud. Marcello Drutel èro prefoudamen prouvençalo e felibresso. Pamens fuguè pas en chancello pèr dire sa pensado pèr ço qu’es de l’aveni de la lengo e diguè : « Suli Andriéu-Peyre nous fai tambèn remarca que lou naciounalisme mistralen es esta « la clau que despetello, - pèr embarra mai la coumtesso dins sa tourre. Es-ti la fauto dóu Mèstre, vo di disciple ? E perdeque voudrian-ti de longo faire de souto-imitacioun d’imitacioun mistralenco ? » Gaire de tèms avans que de publica Li Desiranço, Marcello entre-tenguè un liaisoun em’ un ome que ié disien Julian. Si letro soun de temouniage de soun biais d’evouca l’amour, sènso coumpleisse à respèt de l’epoco, entre sentimen e desir carnau. Soulide.
Vaqui pèr aquel óumage à Marcello Drutel. Pèr aro, la crounico es acabado. Dich acò vous doune rendès-vous à le rintrado e vous souvète de bòni vacanço. D’eici d’aqui, tenès-vous fièr e gaiard. Vous brassège amistousamen. Brave mounde adissias !
felip
